ગુજરાતમાં 63.35 લાખથી વધુ ખેડૂતો ફાર્મર રજિસ્ટ્રીમાં નોંધાયા

ગુજરાતમાં કૃષિ વ્યવસ્થાને ડિજિટલ બનાવવાની દિશામાં મહત્વપૂર્ણ પ્રગતિ થઈ છે. રાજ્યમાં અત્યાર સુધીમાં 63.35 લાખથી વધુ ખેડૂતોએ ફાર્મર રજિસ્ટ્રીમાં નોંધણી કરાવી છે. મુખ્યમંત્રી ભૂપેન્દ્ર પટેલના નેતૃત્વ હેઠળ ડિજિટલ એગ્રીકલ્ચર મિશનના અમલીકરણને વેગ આપવામાં આવી રહ્યો છે.

ફાર્મર રજિસ્ટ્રી હેઠળ ખેડૂતોને યુનિક ફાર્મર આઈડી આપવામાં આવે છે. આ ડિજિટલ ઓળખને ખેડૂતની આધાર આધારિત ઓળખ અને જમીનના રેકોર્ડ સાથે જોડવામાં આવે છે. જેના કારણે વિવિધ સરકારી કૃષિ યોજનાઓ અને સેવાઓનો લાભ મેળવવાની પ્રક્રિયા વધુ સરળ અને પારદર્શક બનશે.

મહેસૂલ વિભાગના અધિક મુખ્ય સચિવ ડૉ. જયંતિ એસ. રવિના જણાવ્યા મુજબ, ફાર્મર આઈડીથી ખેડૂતોની ઓળખ અને જમીનની વિગતો ડિજિટલ રીતે એકીકૃત થશે.

આ વ્યવસ્થા દ્વારા PM-KISAN, MSP હેઠળની સરકારી ખરીદી, KCC, કૃષિ ધિરાણ, સબસિડી અને વિવિધ કૃષિ સહાય યોજનાઓમાં લાભાર્થીની ઓળખ અને ચકાસણી સરળ બનશે.

ખેડૂતો મોબાઇલ, સત્તાવાર Farmer Registry Gujarat એપ અથવા સેવા કેન્દ્રો, ગ્રામ પંચાયતના VCE, ગ્રામ સેવક અને CSC કેન્દ્રો મારફતે નોંધણી કરાવી શકે છે.

લાંબા ગાળે ફાર્મર આઈડી ડિજિટલ ક્રોપ સર્વે, કૃષિ ઇનપુટ્સ, ધિરાણ અને ડિજિટલ કૃષિ સેવાઓ સાથે જોડાવા માટે મહત્વપૂર્ણ માધ્યમ બની શકે છે.